Námsstyrkir til blindra og sjónskertra nemenda

Úthlutað var úr Þórsteinssjóði, 3. desember fimm styrkjum til blindra og sjónskertra stúdenta við Háskóla Íslands en undanfarin ár hefur háskólinn lagt áherslu á að blindir og sjónskertir njóti jafnræðis á við aðra og eigi sömu möguleika til náms og þeir. Þetta er í fimmta skipti sem úthlutað er úr sjóðnum. Kristín Ingólfsdóttir rektor afhenti styrkina við hátíðlega athöfn. Upphæð styrkjanna nemur samtals tveimur milljónum króna, segir í tilkynningu frá Háskóla Íslands um málið.

 

_{Á myndinni eru: Kristín Ingólfsdóttir rektor, Eyþór Kamban Þrastarson, Bergvin Oddsson,
Rannveig Traustadóttir, prófessor og formaður stjórnar, Helga Eysteinsdóttir,
formaður Blindravinafélagsins, María Dóra Björnsdóttir, deildarstjóri Náms- og
starfsráðgjafar, Helga Theodóra Jónasdóttir, Inga Sæland Ástvaldsdóttir og
María Hauksdóttir.}

Megintilgangur Þórsteinssjóðs er að styrkja blinda og sjónskerta til náms við Háskóla Íslands. Enn fremur er sjóðnum ætlað að efla rannsóknir sem aukið geta þekkingu á blindu og skertri sýn og afleiðingum hennar og fjölga þannig tækifærum blindra og sjónskertra til að auðga og efla líf sitt. Sérstök áhersla er lögð á styrki til rannsókna í félags- og hugvísindum sem falla að tilgangi sjóðsins

Námsstyrki í ár hljóta: Bergvin Oddsson, nemi í stjórnmálafræði, Eyþór Kamban Þrastarson, nemi í félagsfræði, Helga Theodóra Jónasdóttir, nemi í sálfræði, Inga Sæland Ástvaldsdóttir, nemi í lögfræði, og María Hauksdóttir, nemi í guðfræði. Hlýtur hver um sig 400.000 króna styrk.

Hanna Björg Sigurjónsdóttir dósent kynnti jafnframt fyrstu niðurstöður rannsóknarverkefnis sem hún vinnur að ásamt Knúti Birgissyni, doktorsnema í fötlunarfræðum við Háskóla Íslands. Þau hlutu styrk úr Þórsteinssjóði á síðasta ári til verkefnisins sem ber heitið Möguleikar blinds og sjónskerts fólks til að stunda háskólanám á Íslandi. Verkefnið miðar að því að afla þekkingar og skilnings á þeim þáttum sem ýmist stuðla að háskólanámi blindra og sjónskertra eða hindra það.

Rannsóknin er hluti af stærri rannsókn sem ber heitið Jafnrétti til náms – Réttur og raunverleiki fatlaðra nemenda við Háskóla Íslands. Markmið þeirrar rannsóknar er annars vegar að greina stöðu fatlaðra nemenda við Háskóla Íslands út frá íslenskum rétti, reglum sem háskólinn hefur sett sér, mannréttindasáttmálum og mannréttindaáherslum sem má finna í nýjum samningi Sþ um réttindi fatlaðs fólks. Hins vegar er ætlunin að kanna reynslu fatlaðra nemenda af námi í Háskóla Íslands, kennsluhætti, stuðningsúrræði og aðgengi að byggingum og námsefni.

Fá táknmálstúlk í kennslustundum

Háskóli Íslands hefur á undanförnum árum bætt mjög stuðning sinn við fatlaða stúdenta. Sá stuðningur kemur einna skýrast fram gagnvart heyrnarlausum stúdentum en þeim stendur nú táknmálstúlkun til boða fyrir hverja kennslustund, auk annarrar aðstoðar. Þótt niðurstöður rannsóknarinnar liggi ekki fyrir er ljóst að talsvert hefur einnig áunnist í málefnum blindra og sjónskertra nemenda, segir í frétt Háskólans.

Skönnun námsefnis er til að mynda komin í mun betra horf en áður var og niðurstöður benda til þess að viðhorf kennara og annars starfsfólks séu almennt jákvæð og að skilningur og vilji sé til frekari úrbóta. Samt sem áður vantar enn talsvert upp á að aðstæður og aðbúnaður séu fullnægjandi. Víða er manngert umhverfi illa aðgengilegt þar sem leiðarlínur vantar og öryggisþáttum er ábótavant.

Nauðsynleg stuðningsúrræði, s.s. sjóntúlkun, eru ekki til staðar og aðstoðarmannakerfið að öðru leyti ekki nægilega öflugt. Kennsluhættir eru mismunandi eftir deildum og yfirleitt er ekki gert sérstaklega ráð fyrir blindum og mikið sjónskertum nemendum. Framsetning námsefnis er því misjafnlega „sjónræn“ og af þeim sökum er námsval takmarkað.

 

Kristín Ingólfsdóttir rektor, Eyþór Kamban Þrastarson, Bergvin Oddsson, Rannveig Traustadóttir, prófessor og formaður stjórnar, Helga Eysteinsdóttir, formaður Blindravinafélagsins, María Dóra Björnsdóttir, deildarstjóri Náms- og starfsráðgjafar, Helga Theodóra Jónasdóttir, Inga Sæland Ástvaldsdóttir og María Hauksdóttir.