Nýtt greiðsluþátttökukerfi vegna lyfjakaupa væntanlegt

Það sem einkennir núgildandi kerfi er að kostnaður þeirra sem þurfa á mörgum og dýrum lyfjum að halda, eða nota lyf að staðaldri, getur orðið mjög hár vegna þess að ekki er um neitt hámark á lyfjakostnaði einstaklinga að ræða. Þá er greiðsluþátttaka mismikil eftir lyfjaflokkum sem skapar mismunun milli einstaklinga.

Nýja kerfið

Með nýja kerfinu mun jafnræði einstaklinga aukast við kaup á lyfjum, kerfið verður einfaldara og þeir sem mest þurfa á lyfjum að halda munu greiða minna en áður. Kerfið byggir á þrepaskiptri greiðsluþátttöku þar sem hver einstaklingur greiðir hlutfallslega minna eftir því sem lyfjakostnaður hans eykst innan tólf mánaða tímabils. Öll lyf sem Sjúkratryggingar Íslands (SÍ) taka þátt í að greiða verða felld inn í þessi greiðsluþrep og þannig verður stuðlað að jafnræði milli einstaklinga.

Tólf mánaða greiðslutímabilið hefst við fyrstu lyfjakaup einstaklingsins. Sem dæmi má nefna að ef einstaklingur kaupir lyf í fyrsta sinn 15. maí 2013 þá lýkur tímabilinu 15. maí 2014. Nýtt tímabil hefst þegar viðkomandi kaupir lyf í fyrsta sinn eftir að framangreindu tímabili lýkur.

Hvað greiðir maður fyrir lyf þegar nýtt greiðsluþátttökukerfi tekur gildi?

Þrep	Heildarlyfjakostnaður á 12 mánaða tímabili		Greiðsluhlutfall
	Almennt	Ungmenni / lífeyrisþegar *	Einstaklingar	Sjúkratryggingar
1	0–24.075 kr	0 –16.050 kr.	100%	0%
2	24.076 kr – 96.300 kr	16.051 kr – 64.200 kr	15%	85%
3	96.301 kr – 556.400 kr	64.201 kr – 395.900 kr	7,5%	92,5%
4	Umfram 556.400 kr	Umfram 395.900 kr.	0%	100% **

* Elli- og örkorkulífeyrisþegar og börn og ungmenni yngri en 22. ára.

** SÍ greiða lyf að fullu skv. skilyrðum og umsókn frá lækni. Annars greiðir einstaklingur 7,5%. Skilyrði verða kynnt síðar.

Dæmi um greiðslur fyrir lyf - Eva og Jón

Eva greiðir almennt verð fyrir lyf

Dags. lyfjakaupa	Heildarverð	Eva greiðir	Skýringar
15. maí. 2013	19.000 kr	19.000 kr	Greiðslutímabil hefst - Eva greiðir 100% samkvæmt þrepi 1.
3. júní 2013	21.000 kr	7.464 kr	Eva greiðir 15% fyrir mestan hluta upphæðar samkvæmt þrepi 2.
20. júl. 2013	53.000  kr	7.950 kr	Eva greiðir 15% samkvæmt þrepi 2.
12. nóv. 2013	27.000 kr	2.273 kr	Eva greiðir 7,5% fyrir mestan hluta upphæðar samkvæmt þrepi 3.
25. feb. 2014	21.000 kr	1.575 kr	Eva greiðir 7,5% samkvæmt þrepi 3.
Alls á tímabili:	141.000 kr	38.262 kr
15. maí. 2014	21.000 kr	21.000 kr	Nýtt timabil hefst - Eva greiðir 100% samkvæmt þrepi 1.

Jón er eitt af eftirfarandi og greiðir minna fyrir lyf, örorkulífeyrisþegi, ellilífeyrisþegi, barn eða ungmenni 18 - 22. ára.

Dags. lyfjakaupa	Heildarverð	Jón greiðir	Skýringar
15. maí. 2013	19.000 kr	16.493 kr	Greiðslutímabil hefst - Jón greiðir 100% upp í þak á þrepi 1 og hluta greiðir hann 15% samkvæmt þrepi 2.
3. júní 2013	21.000 kr	3.150 kr	Jón greiðir 15% samkvæmt þrepi 2.
20. júl. 2013	53.000 kr	5.790 kr	Jón greiðir upp í þak á þrepi 2 og hluta greiðir hann 7,5% samkvæmt þrepi 3.
12. nóv. 2013	27.000 kr	2.025 kr	Jón greiðir 7,5% samkvæmt þrepi 3.
25. feb. 2014	21.000 kr	1.575 kr	Jón greiðir 7,5% samkvæmt þrepi 3.
Alls á tímabili:	141.000 kr	29.033 kr
15. maí. 2014	21.000 kr	16.793 kr	Nýtt greiðslutímabil hefst - Jón greiðir 100% upp í þak á þrepi 1 og hluta greiðir hann 15% samkvæmt þrepi 2.

Nánari upplýsingar

Lyfjadeild SÍ veitir upplýsingar í gegnum netfangið lyfjadeild@sjukra.is. Nánari kynning á nýja greiðsluþátttökukerfinu er væntanleg.

Athugið að SÍ gera fyrirvara á ofangreindum upplýsingum þar sem þær byggja á drögum að reglugerð. 

 

• Breyting á lögum um sjúkratryggingar (Nýtt greiðsluþátttökukerfi í lyfjum)
  (PDF skjal)

• Ferill lagasetningar á Alþingi um nýtt greiðsluþátttökukerfi í lyfjum (Opnast í nýjum vafraglugga)