Breyta þarf fjöleignarhúsalögum til að tryggja að rétt leiðsöguhundanotenda

„Ég hef ekki heyrt orð,“ segir Svanhildur Anna Sveinsdóttir aðspurð um það hvort að hún fái að búa áfram í íbúð sinni á Akranesi með blindrahundinum Exo. Haldinn var húsfundur vegna málsins í gærkvöldi en Svanhildur hefur ekki fengið að heyra hvað fór fram á honum eða hver niðurstaðan þar var.

Svanhildur er sjón- og heyrnarskert og þjáist af jafnvægisleysi eftir heilaæxli. Hún fékk nýlega hund sem hjálpar henni mikið í daglegu lífi. Hún býr í fjölbýlishúsi á Akranesi og getur ekki haft hundinn nema með samþykki allra íbúa. Íbúar sem fluttu nýlega inn í húsið hafa ekki veitt henni leyfi þeirra. Því bendir allt til þess að hún þurfi að velja milli íbúðarinnar og hundsins.

Málið hefur vakið gríðarlega athygli á Akranesi, og eru margir íbúar bæjarins ósáttir við það að Svanhildur þurfi að flytja með hundinn úr íbúðinni sinni. Húsfélagið ákvað að halda fund vegna stöðunnar í kærkvöldi. Endurskoða átti ákvörðun um að framlengja ekki leyfið sem Svanhildur hefur til að vera með Exo. Íbúar sem DV hafði samband við vildu ekkert tjá sig um málið.

„Exo hefur reynst mér mjög vel þennan stutta tíma sem við höfum átt saman. Ég vona að hann þurfi ekki að fara. Það er svo mikill styrkur að hafa hann. Hann er mér svo góður förunautur þegar ég er úti, og veitir mér svo mikið öryggi. Það bætir lífskjörin að hafa hann. Fólk hefur talað um hvað það sé gaman að sjá mig á röltinu úti við, því áður en ég fékk hundinn, sem hefur auðveldað mér svo mikið að komast út fyrir húsið, var ég lítið á ferðinni. Lífið hefur gjörbreyst með tilkomu Exo,“ sagði Svanhildur við DV.is í gærkvöldi.

„Ég hef fundið fyrir gríðarlegum stuðningi í dag, fólk hefur lýst yfir hneykslun sinni yfir þessari stöðu. Exo er rosalega ljúfur og stilltur. Hann geltir ekki og ónáðar engan,“ sagði Svanhildur.